外號「唔得掂」嘅教育局局長吳克儉，佢一出聲就開口夾着脷。呢，日前佢提及即將發表嘅防止學生自殺委員會報告，指學生壓力其中一個成因係未有做好生涯規劃。
局長，好深奧啊！老朽活到這把年紀，至今一事無成，人老珠黃，從不知何謂「生涯規劃」，即使過年，家貧也只能「山家除夕無他事，插了野花便過年」！少年的我，不知生涯規劃為何物；今日的我，已齒搖搖、髮蒼蒼，依然不懂規劃。我想再一次用「破天荒」呢三個字明志：老朽破天荒唔會因為入住唔到心儀嘅豪宅，寓所地段又唔係誠哥隔壁，在自己、家人及朋友期望的三種壓力下，就忽然自卑忍不住自戕了此殘生。所以生涯規劃對老朽全不重要，容我再三破天荒咁講，老朽冇自殺就因為冇生涯規劃，否則以如此疏懶不求長進之性格，規劃不成，盞鬱結成病，規唔規劃都死！
老朽之所以有如此感慨，皆因吳克儉舉咗一個例：有些大學生雖然入到心儀大學，但選讀科目未必是自己興趣及強項，在自己、家人及朋友期望的三重壓力下，一有不快事情發生，就會忍受不了，所以生涯規劃非常重要。聽佢嘅舉例，大家就明白吳克儉係隨口噏當秘笈；學生自殺主因幾時輪到乜鬼「規劃」啊，更多的是情緒精神壓力和抗逆能力不足，加上忽視生命教育，這些原因都比生涯規劃靠譜吧？
文章難免有錯字，但錯字不要緊。周作人曾說過：不怕錯得沒有意思，皆因讀者一看便知道，最怕是錯得有意思。有些錯是編輯自以為是改的，好像把「砂鍋居」改成「沙鍋居」，作者便苦笑編輯肯定沒有在北京住過。老朽覺得吳克儉就是錯得有意思，學生睇唔開也許多是太有生涯規劃，偶一不達標就萌死念也。吳克儉備受不信任，依然破天荒堅守教育局局長大位，未曾想過自我引退，是相當迎難而上嘅生涯規劃，佩服！