政情：八網難逃：吼準時間教「流會」 德領館又抽水

點人數搞到流會一向係泛民主派「專利」，但建制派喺尋日立法會正式會議率先拉隊離場引發流會，力阻青年新政游蕙禎同梁頌恆重新宣誓。經常喺網上教德文嘅德國駐港總領事館喺流會後不足五小時，就喺其社交網站專頁上載圖片（圖），以中英雙語教網民「流會」嘅德文「vertagen」，更附上例句「會議因人數不足而導致流會」，明顯係講緊建制派議員拉隊走人。其實德領館經常就香港政事抽水，早前就教過「辛苦」嘅德文「anstrengend」，並加上稻田配圖嚟暗示政府搵地起樓係「粒粒皆辛苦」，於是被網民封為「德國抽濕機」。