政情：打尖申撥 政府靠害建制派
立法會十八個事務委員會陸續選出正、副主席。財務委員會轄下嘅工務小組及人事編制兩個小組委員會嘅正、副主席亦於尋日選出，分別由工程界盧偉國及新民黨葉劉淑儀（葉劉）出任。政府早前同立法會內務委員會正、副主席會面時，透露想將上屆立法會未完成嘅撥款項目直接提交到財務委員會同轄下兩個小組委員會審議，即係變相打尖，分分鐘被非建制派留難。睇嚟葉劉、盧偉國同早前已順利連任財委會主席嘅陳健波一上任就要面對挑戰喇！
唔想重新諮詢 盡快「開工」
工務小組及人事編制小組由盧偉國同葉劉分別順利連任主席外，兩個小組副主席一職就由兩位非建制派議員、即資訊科技界莫乃光同公民黨楊岳橋自動當選。不過，相信陳健波、盧偉國、葉劉好快就會面對考驗，皆因政府早前同內會正、副主席李慧琼、郭榮鏗見面後就話，政府正探討能否將部分項目直接提交財委會或相關小組委員會審議，毋須重新諮詢事務委員會，以令政府工作盡快展開。
其實每逢立法會換屆，上屆未通過嘅撥款同議程都要跟足程序重新提交新一屆立法會審議，先經事務委員會，再逐步提交上財委會通過。政府現時想將上屆難產項目繞過事務委員會，直接提交財委會同轄下兩個小組委員會，無疑係打尖，繞過慣常程序。
上屆立法會完結時，仲有九項撥款未獲財委會同轄下兩個小組委員會通過，其中財委會就有觀塘海濱音樂噴泉、灣仔摩頓臺活動中心及大埔林村許願廣場旅遊配套設施三項社區重點項目工程撥款，仲有負責大嶼山拓展計劃，以及監察港鐵完成高鐵工程工作嘅開設職位建議。
七國咁亂 非建制派勢攔路
不過，非建制派喺今屆立法會一開波已經搞到七國咁亂，加上正如陳健波話齋，上屆未能通過嘅都係具爭議性嘅項目，要打尖除非政府有好強嘅理據。所以政府如果以為立法會換屆就可以順利打尖，就真係太大想頭喇，仲隨時連累陳健波、葉劉同盧偉國要做擋箭牌，迎戰一班非建制派議員。