社交網絡世界發展蓬勃，網民意見嘅影響好大，立法會議員亦愈來愈重視自己嘅網絡形象同網民意見。立法會圖書館因應社交媒體喺提供突發新聞及政治、社會議題嘅資訊方面擔當日趨重要嘅角色，就以試驗性質推出新服務，將社交媒體上嘅焦點熱話製作成簡報，連同網民意見撰寫成撮要畀議員參考。秘書處咁貼心，如果議員仲咁離地，就證明佢哋真係懶到貼地喇！
立法會圖書館呢個社交網站資訊搜集服務會將即日社交網站熱議嘅政治、社會重要新聞收集，再將網民對事件嘅立場以「中性」、「正面」、「負面」分類，再簡單概括網民意見。好似尋日咁，就列出咗港大公布嘅十大議員民調，同埋建制派發動流會等事件，以及網民嘅反應，真係快手。
無論係議員定議員助理都可以喺立法會圖書館使用服務，而秘書處亦會喺每日上午及下午兩個時段將資料以電郵寄畀議員。其實秘書處一向都有為議員提供剪報服務，依家連收集民意都幫議員做埋，唔知議員會唔會因此而請少個助理，慳咗辦事處營運開支呢？
卓妮