中環出更：台灣月開幕 路平專程返港搖奶茶
由台灣文化部駐港機構光華新聞文化中心主辦嘅「台灣月」，話咁快已踏入第十一年，早前一眾台灣幫齊集舉行開幕儀式。現場有一位稀客，就係任內推出台灣月嘅光華前主任兼靚女作家路平，佢現時擔任台港經濟文化合作策進會董事長，趁今年係台灣月邁入第二個十年嘅第一年，所以專程來港參與。
現場有台灣奶茶創始家族後人劉彥伶示範點樣搖出一杯靚珍珠奶茶，路平及台北經濟文化辦事處處長嚴重光都搖埋一份，兩人雞手鴨腳炮製成功後，飲一啖，特別好味。
今屆台灣月活動包括音樂、劇場、展覽及講座等，由十月中旬至十二月初止。贊助台灣月多年嘅亞洲聯合財務董事總經理張炳煌話，近十年台港民間交流密切，台灣唔止係港人外遊熱點，仲係港人最想移民嘅地方，台灣月確係功不可沒。
蔡宏賢林欣傑設計《稻浪隨風》
講到台灣特色，珍珠奶茶都極具代表性。劉彥伶話，三十三年前，佢父親原本開茶行，當年大家只係飲老人茶，到夏天就冇乜生意。佢爸爸於是嘗試將紅茶、冰及糖一齊放入搖搖杯，就咁搖出台灣第一杯泡沫奶茶，其後試過加入唔同嘢，直至加入粉圓即一鳴驚人，成為風靡萬千嘅珍珠奶茶喇！
同場仲有台灣觀光局駐港辦事處主任蔡宗昇及長榮航空香港分公司總主任張明弘，台灣藝術家蔡宏賢及香港藝術家林欣傑都喺度，佢哋攜手設計一幅裝置藝術《稻浪隨風》作為今屆台灣月嘅主題展，目的係呼應台港居民對於土地議題嘅關注。
卓妮