中環出更：讀中史震撼 潘佩璆拒認「香蕉」
工聯會前立法會議員潘佩璆尋日喺facebook發文，指被「黃絲帶」網民批評佢已被洗腦。佢就寫下長文回應，指自己雖然長時間接觸西方文化，但未被洗腦成為一隻「黃皮白心的香蕉」，更反指人生唯一一次被洗腦，怕且就係中學時期學習中國歷史喎！
潘佩璆猜測，因為自己加入愛國愛港陣營近十年，所以惹人認為佢自小受左派團體同左派人士影響。佢承認，的確與愛國愛港朋友感情非常好，同聲同氣，但就話自己所走過嘅路十分獨特。
稱常接觸西方文化價值觀
佢細數成長經歷，例如曾到教堂參加主日學同受浸、入讀傳統教會英文中學、到西方國家生活等。佢更話自己訂閱多本站在西方立場嘅財經政治雜誌，按道理腦袋應該已被西方文化同價值觀佔據，成為黃皮白心嘅香蕉，但事實上冇被洗腦喎。
咁點解佢如此愛國愛港呢？佢解釋，因為十五歲學習清朝至民國近代史時，接觸到百年國難，形容當時感覺震撼，令血氣方剛嘅佢無法視而不見咁話，所以唔能夠「認賊作父」，更話呢段經歷算係「生平唯一一次」被洗腦添。忽然咁有感觸，唔通潘佩璆暗批有人「認賊作父」？
卓妮