中環出更：奇裝鼠戰 議員唔使包尾
中環尋日出現一班「過街老鼠」穿越多棟甲級商廈及行人通道，但呢班老鼠非常開心，事關舉行慈善盛事「鼠戰中環」，一大班參賽者出盡法寶扮鬼扮馬，衝過重重障礙，為推廣精神健康嘅「思健」籌募善款。卓妮見到四名立法會議員都有組隊參賽，但負責第一棒嘅批發及零售界議員邵家輝一起步就墮後一大截，最後要靠尾棒嘅楊岳橋先爭番啖氣，但都只係超前一隊，叫做唔使包尾囉！
一班造型出位嘅挑戰者要在中環核心地帶克服多個障礙，包括避開箭如雨下、象徵辦公室暗箭嘅玩具箭及大型吹氣文具等障礙物，並用公事包代替接力棒直奔終點籌款。其中邵家輝、楊岳橋、資訊科技界議員莫乃光及涂謹申（阿涂）組成一隊，佢哋以一身格仔恤衫、牛仔褲、配上爆炸頭假髮及大黑超嘅復古造型現身。
阿涂跑樓梯索晒氣
已經參加過幾年鼠戰嘅阿涂同莫乃光負責帶住兩名新丁邵家輝同楊岳橋出賽。阿涂話，平時喺辦公室坐得多，難得有機會鬆吓筋骨，就算幾忙都抽時間參加，仲話跑樓梯都跑到索晒氣。臨尾努力超前嘅楊岳橋就話，佢事前冇練習，證明後生體力係唔同啲。
不過，正因為楊岳橋咁「爭氣」，令佢哋同獎項擦身而過，皆因大會話除咗頭五名有獎外，包尾嘅都有個「最具鼠戰精神獎」，仲透露莫乃光早幾年就拎過呢個安慰獎喇，因為有一年莫乃光好有風度咁禮讓包尾嘅女士先衝線喎。
怡和控股有限公司副行政總裁彭耀佳呢日就代表母公司怡和參賽，與一班同事化身電影「捉鬼敢死隊」角色，話着連身褲跑方便啲喎。中西區區議員蕭嘉怡就化咗個妝扮可愛貓喵，仲同現場其他隊伍影相留念湊熱鬧。
卓妮