街工立法會議員梁耀忠日前主持立法會主席選舉期間，自己主動放棄主持責任，將會議大權交給建制派石禮謙；如此冇膊頭冇承擔，惹來一眾民主派支持者非議及猛烈抨擊。事後，他召開記招，除了向公眾鞠躬道歉，更多次哽咽，聲稱遭秘書處出賣。
梁耀忠的所謂「出賣」，是指秘書處誤導他，指他的權力只限於處理主席選舉的議程及宣布結果，他特別強調按《議事規則》他不能夠裁定參選主席的提名是否有效，亦冇權宣布休會；然而到石禮謙主席會議，就容許石自稱主席及行使主席權力。阿哥，枉你做咗逾二十年議員（五次當選新界西選區地區直選議員），又以三十多萬票當選二○一六年超級區議會，威過周浩鼎，叻過涂謹申，講民意基礎及經驗，係五粒超級星；之但係你竟然連主持個選主席會議都驚青成咁，泛民之議事能力如此不濟，今後支持你嘅選民點睇你台戲呢？
自己不濟就唔好賴人「誤導」，既然論資排輩你至威，代得主席有乜理由冇主席嘅權及功架，當梁美芬聲嘶力喝叫你請長毛、毛孟靜、朱凱廸、梁頌恆、游蕙禎返埋座位，你都唔敢開聲，虧你仲係中學教師？石禮謙就唔同喇，一接手即有主席架勢，即運用主席權力不准三名行為不檢未完成宣誓嘅小學雞議員進入會議廳，跟住就選出「脫英」出閘險脫腳嘅梁君彥做主席喇！梁耀忠一味拘謹於規則，自己又不知書，前主席曾鈺成就話喇：根據《議員規則》第3條，主持會議的議員權力與主席相同，並引述法庭裁決指出，主持的議員定當享有必須的權力，包括排除會議的阻礙。
所以話，狹路相逢勇者勝！人哋明白「老鼠冇可能惡過貓」，你則忠忠直直，掌舵失方寸擱淺，喊咁口話畀人誤導出賣；唉！蘇州過後冇艇搭，要聽歌，下次請早。