政情：八網難逃：跳騎呢水管舞 李世隆被寸「傻人」
日本洗腦神曲《PPAP》爆紅，民建聯（民記）立法會議員陳恒鑌今個月初跟風二次創作，喺片中大晒自己喺新界西有好多婆婆支持，點知被網民寸爆。喺去年底區議會選舉以五十四票擊敗民主黨尹兆堅嘅民記葵青區議員李世隆，似乎未吸取教訓，上星期二喺佢facebook帳戶上載一段「鹹水食水食水管」騎呢舞，結果同樣係負評居多。
左扭右扭潑鹹水
片中見李世隆戴上黃色安全帽，其後隨音樂扭動其略肥嘅身軀，見佢拎出水管左右揮舞，又丟水樽又潑鹹水，但睇完呢四十多秒嘅短片，真係唔知佢究竟搞邊科，網友留言亦毫不客氣，指「不如去做小丑啦」、「傻人發現」、「點解唔唱埋鉛水管」等，畀like嘅網民唔多，認真慘情。
李世隆事後再喺fb解釋，指民記希望水務署可盡快喺大白田徑增設一條後備食水管及一條後備鹹水管，解決東北葵供水不穩定嘅隱患，而拍短片係想加深街坊對「雙管齊下」方案嘅認識喎。民記想搶攻網上平台爭取年輕人支持，似乎要再加把勁喇。