政情：陳燿璋趁英鎊跌買公司
英國早前公投決定脫離歐盟之後，英鎊匯率一夜之間跌至三十年低位，之後愈跌愈有，好多人都話要去執平貨，已故慈善家陳樹渠兒子兼寶聲集團董事長陳燿璋（Anson）都唔例外。日前我哋喺一個活動上見到Anson，佢話過去五年港幣兌英鎊已升咗三、四成，所以下月佢會去英國執平嘢，但唔係買物業，而係買有科技含量嘅中小型上市公司。
指外界唱衰脫歐危言聳聽
Anson話，近年美元匯率走強，港幣又同美元掛鈎，所以港幣嘅購買力亦隨之增強。以兌換英鎊來講，港幣近一年內已升咗兩成，若睇長啲時間，五年內差唔多累積升咗三、四成添！既然港幣購買力大增，冇理由唔出去買嘢。佢話英國係有實力及潛力嘅經濟體，脫歐公投後雖然被外界唱衰，但佢認為只係危言聳聽，所謂「爛船仲有三斤釘」，所以佢對英國投資前景審慎樂觀喎！