政情：冧友爭位戰 兩陣營唔齊章
立法會十八個事務委員會及財務委員會轄下嘅工務小組委員會同人事編制小組委員會尋日截止報名加入。喺建制派與非建制派就各委員會正、副主席職位談判破裂嘅情況下，兩大陣營都以「冧友」方式搶攻各委員會，務求喺委員會正、副主席選舉時成功搶灘。不過，不論建制派或非建制派都有議員唔配合，其中非建制派陣營嘅熱血公民鄭松泰、青年新政梁頌恆、以及中間「偏黃」嘅醫學界陳沛然都冇加入全數十八個委員會。而建制派方面，自由黨亦繼續「唔聽話」，冇跟建制派大隊。
喺兩大陣營積極冧友下，大部分建制派議員都至少加入咗十五個委員會，非建制派陣營三十人中，更有二十八人加入晒全數十八個委員會，結果連同委員會及財委員會轄下兩個小組委員會，二十個委員會中，有十八個都有超過六十名議員加入，歷來罕見。
陳沛然只入五委會最「離群」
各委員會中，房屋及保安兩個委員會各有六十六名議員加入，係最多議員加入嘅委員會。而建制派擬放手畀非建制派出任主席嘅衞生、福利兩個委員會，就分別有四十二名及三十五名議員加入。至於財委會轄下兩個小組委員會都各有六十三人加入。
不過，兩大陣營都有部分議員未有配合雙方嘅冧友攻勢。非建制派陣營入面，雖然朱凱廸、劉小麗、建築界姚松炎、香港眾志羅冠聰及青年新政游蕙禎五名本土自決派議員都加入晒全數委員會，但梁頌恆及鄭松泰就未有配合。至於只係加入五個委員會嘅陳沛然，更加係入得最少委員會嘅議員。
「姚梁游」未完成宣誓存變數
至於建制派方面，一向都唔聽話嘅自由黨，四位議員各自係只加入咗不足十個委員會，其中鍾國斌更只加入八個委員會，係加入最少委員會嘅建制派議員。至於勞工界議員潘兆平，亦只係加入咗九個委員會。
雖然大部分議員好踴躍加入委員會，但係姚松炎、梁頌恆及游蕙禎仍然未完成宣誓，究竟佢哋係咪具有資格加入委員會，同埋參與各委員會主席選舉，至今仍然係未知之數，睇嚟到時又會掀起另一輪爭拗喇！