中環出更：租場畀白鴿壞冷氣 鄉局靠害？
北區區議員林卓廷（阿廷）成功接劉慧卿（卿姐）棒，當選新界東立法會議員，尋日中午就宴請一班沙田義工，卿姐及多位「乳鴿」包括立法會議員鄺俊宇、沙田區議員「女神」曾素麗等都有捧場。由於義工眾多，阿廷就租借咗鄉議局場地，點知鄉議局就咁啱壞冷氣，喺成攝氏三十度下，卿姐成身濕晒，仲直言「熱到跳舞」。
阿廷卿姐大汗疊細汗
一向愛打扮嘅卿姐着咗件花花中袖外套，悉心打扮出席阿廷嘅活動，點知去到先發現壞冷氣，搞到大汗疊細汗。之後鄉議局前主席劉皇發（發叔）妹夫薛浩然現身解畫及跟進情況，卿姐話原本打算介紹薛浩然畀阿廷認識，點知就講錯咗薛浩然係發叔女婿，認真搞笑。
阿廷話，因為今次主要宴請沙田嘅區議員、街坊及義工，有成百幾人，諗住鄉議局地方夠大先至租用，點知唔止壞冷氣，仲要幾個鐘都冇人維修，最後保安員只係搬幾把風扇畀佢哋。問到會唔會唔再借用鄉議局場地，阿廷就話怕鬼咗佢哋喎。鄉議局收得場地租金，但提供咁嘅服務質素，又難怪卿姐同阿廷嬲嬲豬嘅。
卓妮