中環出更：菁英會另類交流 帶學生睇Formula E
近年唔少組織都話關注青年工作及發展問題，希望提升學生向上流動嘅能力，每年搞實習交流團幾乎變成指定動作，多到啲學生都唔識揀。不過，卓妮早前就發現有項比較特別嘅活動，菁英會主席盧金榮及常務副主席莊家彬就安排咗一班學生參觀及現場了解首次喺香港舉辦嘅電動方程式Formula E嘅預備工作，實在非常難得。
盧金榮冧莊再做主席
香港菁英會日前舉行第九屆執委會就職禮及晚宴，盧金榮冧莊做多一屆主席，莊家彬續任常務副主席。話說名人圈中不時流傳盧金榮手車好得，喺外國時仲曾經攞過賽車獎項，但因為佢現時有兩位千金，已經冇再玩賽車喇。不過，佢仍有機會踏足賽車場，皆因早前聯同莊家彬難得安排到學生參觀Formula E賽車嘅前期工作，而佢仲有觀賞賽事添，但感受就同一級方程式賽事差好遠喇，點解？皆因電車冇引擎聲囉！
施榮忻楊華勇撐後輩
講番當晚就職晚宴，除咗創會主席施榮忻、榮譽主席白富鴻、洪為民、楊華勇、梁宏正等資深成員在場，盧金榮太太唐頌勳、家姐盧金治與丈夫兼立法會議員吳永嘉亦有現身。話說吳永嘉做咗議員之後唔知係咪面對鏡頭多咗，影相時笑容比以前自然得多，唔通喺屋企練習過？太太盧金治就笑指丈夫冇練過，但忙咗就一定喇，但幾忙都好，一星期點都會預留番一日打羽毛球。
盧金榮情況亦類似，由於兩個女仲細，盡量都會減少星期六日應酬，抽時間陪太太及兩個女游水踩單車，做多啲戶外運動，把握親子機會。
卓妮