新科議員於就職宣誓誓詞中加料、玩嘢，佢哋一朝得志就語無倫次，不學無術卻自視過高，不把立法會秘書處的「溫馨提示」放在眼內：議員若於誓詞中「加料」未能完成誓詞，該人必須離任或被取消就任資格；新科議員視之為耳邊風都唔緊要，然而，挾着「扑嘢」論而聲名大噪的長髮玉女游蕙禎，出位到疑似在誓詞中加入fxxking呢個「助語詞」以「明志」，性急成咁，與玉女形象大纜扯唔埋，終於上演了「慾女玩嘢，眾怒難任」。
「眾怒難任」一般人口頭會說成眾怒難犯，然而老朽想起唐朝陸贄《奉天請罷瓊林大盈二庫狀》中的「眾怒難任，蓄怨終泄」呢個典故：唐德宗在行宮中修瓊林、大盈兩個私竇，佢唔係用作「扑嘢」空間，而係用嚟收藏各地進貢嘅財物。身為宰相嘅陸贄上疏力諫，認為一國之首如此斂財聚物，恐怕會使天下怨怒。市民日積月累嘅怨怒隨時會爆發，對住呢班垃圾議員，唔嬲爆至奇。
游蕙禎一扑成名卻不懂見好就收，扑完再來fxxk，今次終於出事喇，有網民發起聯署指「你可以唔做中國人，但你唔可以咁樣侮辱中國人」，除了譴責其侮辱及歧視言論，更要求佢公開道歉及收回有關言論。
觀乎呢班小學雞議員，有膽做又冇膽認，梁頌恆把China讀成「支那」，態度輕佻，英語對話超窒露底，一時話自己英文水準唔掂，一時話係鴨脷洲口音。人必自侮而後人侮之，如此不尊重自己的國家、民族，還胡言甚麼民族自決？把日本軍國主義對中國的稱呼「支那」放在誓詞裏當眾讀出，癲成咁仲以為好有型，試問有何資格當代議士？
本屆政府管治無能，很大程度就是執法不力，既然話未能完成誓詞者必須離任或被取消就任資格，如今有議員在誓詞中「加料」辱國，政府豈能無所作為？