政情：今日你上鏡：嘉頓山攻頂 邱副懶叻

近日秋意漸濃，運輸及房屋局副局長邱誠武（邱副）趁機行山舒展筋骨，尋日同世界綠色組織成員一齊登上位於深水埗區嘅「嘉頓山」（又名窩仔山）。成日坐辦公室嘅邱副上山唔夠十分鐘，行咗百幾級石級，到山腰已經要求休息，周圍影相同玩自拍抖抖氣。抖咗十分鐘左右再出發，邱副似乎上咗力，步速加快，大約半個鐘終於成功攻頂，仲好得戚話「乜咁容易咋？」其實嘉頓山只有九十米高，大約五百級樓梯，附近居民只係當晨運徑嚟行，行得快唔使十五分鐘就到山頂，邱副想攞威，睇怕要再行快兩步先得嘞。