政情：台靚女音樂家最怕錄曱甴聲
音樂家有好多種，屢獲世界級大獎嘅台灣靚女音樂家吳金黛（Judy），就擅長收錄大自然嘅聲音，然後加入創作嘅樂曲之中。早前佢應邀來港出席光華新聞文化中心講座，分享錄製蟲鳴鳥叫嘅難忘經歷。Judy笑稱，入行廿幾年來錄盡自然萬物聲音，唯獨最驚嘅曱甴就咪搞喎！
Judy話，喺大自然收音時不時被人類製造嘅噪音干擾，試過錄黑臉琵鷺聲音時，因遠處傳來鞭炮而嚇跑群鳥。由於佢成日喺田野中流連，因此結識一班保育人士，對人類破壞環境嘅感受亦特別深刻。
佢話，有一位蝴蝶專家發現紫斑蝶由南向北遷徙時，喺必經嘅高速公路死傷慘重，呢位專家遂要求政府喺紫斑蝶遷徙季節關閉公路。聽落係咪好似發夢呢？但結果政府真係搵人監察住，當蝴蝶超過五百隻就封閉一條行車線，以減低氣流對蝴蝶嘅殺傷力。呢個答案令人大感意外，講座主持國際華商協進會會長羅台秦都大呼感動。Judy仲將呢個美麗嘅故事，變成佢件連身裙上嘅圖案添！