政情：陳恒鑌漏夜搬尿片救B
立法會一開鑼即癱瘓，非建制派搞到議會七國咁亂，影響議會運作之餘，亦影響唔少議員嘅日常生活。立法會議員陳恒鑌（Ben）就係被會議困得太耐，搞到前晚十一點鐘，先有時間抬兩箱尿片回家，營救冇尿片用嘅半歲大嘅兒子。
阿Ben話，佢個仔上星期已經用晒啲尿片，但立法會開鑼前夕太忙，要麻煩太太買另一隻頂住先。不過，因為價錢貴，太太亦唔夠力搬，只能買住少少頂住檔，更重要嘅係呢隻替代尿片好易漏，短短一星期已經試過漏到阿仔要換衫沖涼喇，所以佢前晚有時間就即刻去社企搬兩箱尿片返家，估計可以頂到兩個月左右。
不過，以前日立法會開會情況，阿Ben都好擔心未來開會唔知會變成點，佢就提醒太太盡早通知佢就快冇尿片用，等佢安排時間買尿片，以免阿仔漏尿事件重演。