政情：道具搵碇擺 橋「王」申遺
立法會前議員王國興（阿王）都算係議員中最有諗頭嘅一個，過去發言除咗金句多多，更加會運用道具表達訴求，好似用來爭取單肢殘疾人士傷殘津貼嘅「天殘腳」、要求立法會主席從速剪布嘅「金鉸剪」都為人津津樂道，令市民印象深刻。阿王尋日就大呻，自從卸任之後，百多件道具就失去咗容身之所，點知佢好快已經諗到條好橋，就係將道具申請列入本港「非物質文化遺產」，希望當局可以收留百多件道具，以免拎去堆填。
話阿王係立法會「道具王」真係無講錯，事關過去每次發言都幾乎有道具輔助，除咗「天殘腳」及「金鉸剪」外，佢亦曾經有一件道具，係一支內藏房屋嘅牙膏，用來諷刺政府嘅房屋政策，又有爭取男士侍產假嘅BB公仔、以及代表取消強積金對沖機制嘅「對沖豬」等。阿王話，以前立法會大樓辦公室係佢私人道具庫，可惜未能連任，依家已經無位放置收藏，道具或者要送去堆填區。
話當局考慮緊
阿王話，每件道具都代表咗港人嘅故事，係港人嘅心聲，要去堆填好可惜，所以佢上月中就去信康文署非物質文化遺產諮詢委員會主席，要求當局將百多件道具列入非物質文化遺產之中，並加以收藏。佢話，局方兩次回信都話正在考慮當中，暫時都唔會評估可行性，都係盡力而為喇！講到會唔會將道具過繼畀工聯會現任立法會議員，阿王就話暫時未有人向佢提出，如果申請唔成都會考慮喎。
雖然話阿王啲道具非常精緻，但係咪精緻到可以列入非物質文化遺產呢？亦都有人質疑，阿王嘅申請理由牽強，話現時人人都話有土地問題，唔通個個屋企唔夠位放置收藏，就申請將私人物品列入非物質文化遺產咩。不過，大家都只係塘邊鶴，呢啲咁專業嘅嘢最好都係交由專家慢慢去討論喇。