中環出更:民主阿婆赴澳洲唱衰香港

立法會一開鑼立立亂,本土自決派除了宣揚港獨之外,還挑戰立法會議員宣誓程序,成為國際笑話。另一邊廂,不時對香港時事及政治指指點點嘅「民主阿婆」前政務司司長陳方安生,又再不甘寂寞去咗澳洲展開「唱衰香港」之旅,疑似同香港本土自決派嚟個裏應外合大合奏,香港真係唔衰都畀佢哋唱到衰、搞到衰!

被指為「搞事四人幫」之一的民主阿婆,在香港政治能量所餘無幾,去到澳洲難得有當地傳媒訪問佢,當然就唔少得危言聳聽啦!不過,佢來來去去都係講嗰幾句,話中國承諾香港有一國兩制、高度自治,但香港人嘅生活方式同核心價值就逐漸被侵蝕。但成個訪問根本就攞唔出任何證據,來來去去都係話香港就快無晒言論自由、學術自由,講來講去都係三幅被!

曾收黎智英三百萬當無事

在訪問尾聲,民主阿婆可能被人問到「high high哋」,疑似「鬼拍後尾枕」講出真心話。話說當主持人問佢澳洲好多議員都收緊中資機構捐贈嘅時候,佢就話收錢都係可以理解,只要理念及價值觀相同,而且有底線就得喎!唔怪得身為香港2020召集人嘅民主阿婆,當年收取壹傳媒黎智英(漢奸黎)嘅三百萬元捐款都話冇問題啦,莫非佢想暗示自己同漢奸黎臭味相投?但佢條底線又去到邊呢?

卓妮

第一手消息請下載on.cc東網iPhone/iPad/Android/Windows Phone Apps