中環出更:商校合作 助覓鐘錶業新血

為咗幫鐘錶業培養人才,香港鐘表業總會(表總)早前與東華三院旗下中學舉行商校夥伴計劃啟動禮,表總高層及東華董事局成員都踴躍出席支持。表總主席黃麗嫦話,早前佢哋已帶學生到內地首屈一指嘅錶廠參觀,又帶學生去參與香港鐘表展,將來會進一步透過工作坊及體驗活動,希望帶學生走出課室,全方位了解鐘錶業,發掘年輕人對投身業界嘅興趣。

想將自己嘅興趣變成職業,一啲都唔容易,大生銀行後人兼東華三院總理馬清揚就感受深刻。佢自言小時夢想係做電腦工程師,但父母希望佢做律師、醫生或金融業等專業人士,結果佢主修金融、副修電腦,雖然依家都係幫手打理家族生意,但佢畢業時曾喺美國電腦公司工作過,總算係達到父母嘅期望,亦實現自己嘅夢想。

同場仲有「鐘錶大王」兼東華三院前主席孫秉樞及兒子孫大豪、表總副主席徐珊雯、身兼東華三院總理嘅「玩具大王」蔡志明細女蔡加怡(Crystal)等人。Crystal啱啱生完BB四個月,但係已極速收身,加上打扮愈來愈年輕,連徐珊雯都唔信佢已有兩名子女添!

東華頻帶學生出埠見識

東華三院主席馬陳家歡都有到場,最近佢頻頻帶東華學生出埠,先係帶小學生去東京踢足球,跟住帶中學生去倫敦。雖然忙到好似空中飛人,但佢覺得好有意義,因為有啲學生家境唔好,試過有學生連護照都仲未有,難怪佢更加勤力帶學生見識世界喇!

卓妮

第一手消息請下載on.cc東網iPhone/iPad/Android/Windows Phone Apps