咪以為一手交錢、一手交貨係商業社會嘅不變定律喎，實情係有啲公司唔怕你話佢店大欺客，偏要收咗錢唔交貨。邊間公司咁離譜？之唔係國際排名跌跌不休嘅國泰航空囉，佢旗下嘅全資附屬公司國泰港龍又被投訴超賣機票，將有票無位嘅乘客當豬仔咁賣，為咗搵錢無所不用其極，唔係無良係乜吖。
係咁嘅，一對擁有國泰馬可孛羅會會籍嘅夫婦，一個月前訂咗兩張由香港飛武漢嘅港龍機票，原定前日朝早飛去當地傾生意，點知航班突然延誤不特止，仲衰到喺佢哋辦理登機手續嗰陣，職員先至話機票超賣，想夾硬將佢哋「賣豬仔」畀其他航空公司咁話。
港龍收咗錢就係神仙，話之乘客唔能夠準時到達當地將會流失大筆生意，仲大大聲話「全個行業都係overbooked」，十足螃蟹咁打橫行。最後呢對夫婦打電話投訴，軟硬兼施，港龍先至「大發慈悲」喺最後一刻騰出機位。你話嘞，乘客真金白銀換嚟咁嘅服務，衰過廉航，唔谷氣就假！
一句講晒，虱多唔癢。國泰又好，港龍又好，畀人投訴超賣已經係家常便飯。有人飛印尼，因為航班超賣而延誤七粒鐘；有留學生暑假回港，預早辦理網上登機手續，亦因為超賣而焗搭下一班機。至於買咗商務機位被迫「降呢」至經濟艙，買咗經濟艙被迫搭下一班機等等，簡直係鑊鑊新鮮鑊鑊甘。
冇錯，超賣機票或者係「行規」，但點都要有個底線，好似國泰咁幾乎日日被乘客鬧爆，睇怕世上好難搵到第二間咯。正如有人話齋，機票已經賣出，等於雙方簽訂合約，航空公司擅自將座位重複賣畀其他乘客，同毀約冇分別，尤其係國泰係代表香港嘅航空公司，咁樣欺客喎，即係整臭香港旅遊之都個名啫。
話時話，國泰唯利是圖已經夠晒離譜，港府助紂為虐就衰多二錢重。《商品說明條例》明明有「不當地接受付款」條文，可以遏止超賣機票情況，但又自廢武功，容許航空公司以各種藉口作為抗辯理由，有咗呢塊「免死金牌」咯喎，航空公司仲唔有恃無恐咩？仲唔盡情搵消費者笨咩？
講開搵笨，最近國泰又有新猷，計劃將波音客機經濟艙嘅座位由每行九個增至十個，咁一年就可以多載逾百萬乘客，簡直豬籠入水。可憐乘客嘅座位愈變愈窄，同貼錢買難受冇咩分別，難為國泰仲話咁做係「優化旗下產品」喎，有冇再荒謬啲吖！講真，對付無良公司只有一招，就係好似上述差啲被賣豬仔嘅乘客話齋：永不幫襯！