內地將於今年底完成地方人大、政協換屆。早前已經有外國傳媒報道，內地官方以「負面清單」形式，為人大代表及政協委員候選人劃定「資格紅線」，包括擁有外國國籍同接受境外組織資助者，均不得成為人大代表或政協委員。本港有唔少富豪及其二代都身兼不同省、市以至全國政協嘅頭銜，此時政圈傳出，新一屆港區市級政協人數將會減少，即時令外界議論紛紛，係咪同「負面清單」、整頓貪風、趕走懶蟲，甚至本港政局有關，令人更關注矛頭係咪直指港區。
港人要做到各級政協，即使唔係當地人，都要同當地有淵源，例如喺當地投資，而政協一職一直有價有市，坊間盛傳各級政協價錢亦有所不同，咁努力都要攞到呢啲頭銜，除咗想得到虛銜做生意有好處外，亦有可以拎到兩地車牌等方便之處；因此一直有指需要整頓呢種貪腐風氣。
不過，身為政協未必個個有盡本分，例如政協不時需要開會，亦有考察團等，但一啲只為買虛銜嘅政協，往往就未有盡責任去開會同考察，例如有傳有省級政協上任四年，都未有完成政協大會所有議程，明顯唔稱職，甚至有傳要「被請辭」。
政協界消息指，聽聞來屆港區市級政協人數將會減少，但並非因為要整頓貪風或趕走懶蟲，純粹因為港區政協人數太多「爆晒棚」，與本港政局無關，而省級政協影響就不大。到底減去政協數目嘅原因係咪咁，仲有待證實，但減人之後，會唔會真係有助質素提升呢？