政情：楊偉基憶舊時 難忘「漏網魚」湯
提起細個往事，好多時都會諗起同朋友、同學仔一齊幫襯街邊小販嘅回憶。日前獲嶺南大學頒授榮譽院士嘅雲彩行動創辦人楊偉基（Chris）都唔例外，佢話以前讀小學時，成日一放學就同同學一齊去食魚肉湯，到依家諗番起都好回味。其實魚肉湯即係生菜魚肉湯，但由於裏面冇生菜同魚肉，只係齋湯，所以當時只賣一毫子一碗。碗湯乜都冇，Chris話當年如果見到碗湯有一兩條「漏網之魚」，就會覺得好興奮喎。
同學曾邀暑期工「打劫」
Chris仲話當年一毫子可以買到佢最鍾意嘅腸粉，但只得半條。佢記得當年試過有檔主唔肯賣畀佢，仲話唔會有人咁買，但由於Chris死守喺攤檔，檔主見佢細路仔，所以最後都賣畀佢。當年Chris喺老虎岩（樂富）讀書，身邊嘅同學主要係來自基層，雖然佢屋企環境好少少，但屋企都唔會畀太多零用錢佢。佢仲記得，讀小學時曾經諗過做暑期工，亦有同學介紹暑期工畀佢，但原來份工係夜晚去打劫，佢當然冇跟去啦。