香港樓價高，市民「上車難」，但原來都有例外，正如任職理工大學香港專上學院講師嘅立法會議員劉小麗，剛滿四十歲就已擁有兩個物業，係本土自決派嘅「樓王」，反觀係執業大律師嘅新民黨容海恩仍然係「無殼蝸牛」。
立法會網頁上載最後一批議員嘅利益申報資料，劉小麗申報喺九龍及新界各擁有一個物業，而七名本土自決派議員，除咗建築、測量、都市規劃及園境界議員姚松炎申報喺港島區擁有一個物業外，其餘五人都係無殼蝸牛。劉小麗比姚松炎仲多一個物業，換言之，佢係本土自決派嘅「樓王」。
至於容海恩申報有七個受薪職位，包括執業大律師、律政司刑事檢控科外判大律師、一般及家事調解員、精神健康覆核審裁處成員、漁民特惠津貼上訴委員會（禁拖措施）委員、人事登記審裁處審裁員同當值律師服務，但係就冇任何物業。
個別議員擁有物業嘅情況亦有改動，獨立議員謝偉俊上屆申報擁有二十五個物業，分布於本港、內地同美國，而今屆嘅申報就減少咗廣州嘅物業，反而多咗一個位於元朗嘅物業，一出一入仍然維持二十五個物業。
喺選舉捐贈方面，上屆申報有捐贈嘅新界東議員長毛梁國雄，今屆就申報「沒有」，而九龍西議員梁美芬就申報獲所屬政團經民聯捐贈近八十三萬元，由佢出任主席嘅西九新動力亦捐贈咗二萬七千多元。