政情：推廣單車代步 政策局鬥卸膊
政府積極推廣單車作為新嘅代步交通工具，今年施政報告更提及「單車友善環境」政策，可惜早年由地區提出嘅「自助單車租借系統」一直只聞樓梯響。據聞有非牟利團體獲得資助落實計劃，並就租車地點、路線等營運細節完成研究，只欠政府批出租車站選址。不過，運輸及房屋局（運房局）局長張炳良玩卸膊，指單車屬體育政策，屬民政事務局範疇，唔肯孭飛，因而令地政總署未能批出用地，導致計劃落實無期。
立法會議員葛珮帆（EQ）透露，沙田區議會早於○三年找來中大亞太研究所進行研究，指沙田區擁有長達約四十公里嘅單車徑，係全港最具條件發展自助單車租借系統嘅地區。該研究更建議咗七個租車站，包括沙田大會堂、科學園同馬鞍山海濱長廊等，每個租車站提供二十架已植入全球定位系統嘅單車供市民租用，惟計劃最終不了了之。
非牟利團體願試行
一直關注計劃嘅EQ話，單車租借系統營運成本不菲，動輒要逾千萬元，好彩最近有非牟利團體獲得資助，願意負責試行，更將租車點增至逾十個，打造一個強大嘅租車同還車網絡，市民屆時可透過手機應用程式（App）得悉距離最近租車站嘅單車數目，以及使用八達通卡或信用卡「拍卡」取車。目前計劃已進入最後階段，只待地政總署批出用地作為租車站即可試行，但就遇到來自政府嘅阻力。
張炳良支持得把口
EQ指出，地政總署必須得到政策局出信「認頭」支持，先可以就單車租借系統批出用地，所以佢首先搵民政事務局局長劉江華，但對方指單車為交通工具，由運房局管轄；當佢向運房局提出計劃時，雖然局長張炳良連聲支持，但就指單車係一項運動，屬於民政事務局範疇。政府已提出「單車友善環境」政策，但作為政策局局長就玩卸膊未有配合，如果唔係劉江華或張炳良負責，莫非係發展局局長陳茂波負責？抑或係「牛下女車神」李慧詩負責呢？