中環出更：創業轉型 蔡毅明「旗」招設計
香港青年好多都有創意及創業精神，但初出茅廬創業少不免會行冤枉路。為青年做創業明燈嘅香港青年創業家總商會（總商會）早前舉行新一屆就職典禮及周年晚宴，卓妮見到一班年輕創業家，其中由模特兒轉型為近年頗受名人歡迎嘅時裝設計師蔡毅明（Grace）就係具創意嘅創業好例子，佢專走時尚路線嘅旗袍闖出名堂之後，近日更同酒店合作設計主題房間，令人眼前一亮。
新一屆總商會由經營高清製作業務嘅鄺海翔擔任主席，佢除咗邀請幾位成功前輩同大家分享當年創業心得、困難同起伏外，仲搵咗Grace於晚宴期間籌辦時裝騷，邊食中菜邊欣賞旗袍騷，別有一番風味。平日喺設計旗袍時採用唔少新穎布料配搭同剪裁嘅Grace透露，早前有同酒店合作，將房間內嘅多個布置換成中式旗袍常見嘅印花，並轉用其他顏色，睇落復古又新鮮，將創意發揮到衣服以外嘅範疇。
王嘉源教路：善用科技
有創意嘅仲有擔任總商會副主席嘅「港版陀飛輪」萬希泉創辦人沈慧林（William），有感品牌錶款一向較男性化，所以早前佢就同老友嘅珠寶品牌合作設計咗一枚女裝錶款，希望擴大市場，佢仲話呢款錶可以一錶七用，錶面裝飾可以拆出嚟做襟針或吊飾，方便出席唔同場合，但同時又要做到裝飾唔會輕易跌出嚟，有一定技術難度。
同場仲有洗樓王創辦人王嘉源、快譯通創辦人譚偉豪、前海管理局香港事務首席聯絡官洪為民同傑出青年協會主席姜炳耀等。王嘉源話，創業嘅人最緊要放低面子，可以善用現今資訊科技解決每一個遇到嘅問題。
卓妮