有人話︰第一次犯錯係無知，第二次犯錯係愚蠢，第三次犯錯係無可救藥。香港郵政班官僚唔單止一錯再錯，仲要畀人喝住都硬係要錯，簡直醫番都嘥藥費。
話說今年十一月十二日係孫中山先生誕生一百五十周年，香港郵政會喺當日發行紀念郵票，點知其中一張以孫中山曾就讀嘅中央書院作背景嘅郵票，居然犯咗張冠李戴嘅低級錯誤。原來作為皇仁書院前身嘅中央書院，第一代校舍位於歌賦街，孫中山年輕時就係喺度讀書，香港郵政叻唔切，舊年公布設計稿時用咗位於荷李活道同鴨巴甸街交界嘅第二代校舍作背景，如果唔係畀孫中山紀念館人員發現及要求糾正，呢批郵票隨時出街，到時肯定成為國際笑柄。
求其見係「中央書院」，查都唔查就誤將馮京作馬涼，仲有冇再兒戲啲呀，如果郵政官僚返到內地，見個個城市都有「中山路」，容乜易以為中山先生真係足迹遍天下，仲犀利過徐霞客o架。講真，只要尊貴嘅官老爺肯稍移玉步實地視察一下，就唔會犯呢啲咁嘅錯誤，事關中央書院荷李活道舊址屬於孫中山史蹟徑一部分，展板上明明提到校舍落成前，孫中山已經喺中央書院畢業，舉腳之勞都懶得做，問你服未。
唔講大家可能唔知，其實一一年發行嘅「辛亥革命百周年」紀念郵票，郵政署已經搞錯中央書院校舍，當時康文署亦曾指正，點知香港郵政一於少理，照出可也。講到呢度，功夫茶諗起文革期間內地發行嘅「全國山河一片紅」郵票，全國地圖紅當當，唯獨台灣白潺潺，明顯犯政治錯誤，被當局緊急收回，小量流出嘅不知幾矜貴，分分鐘值幾百萬港元，上述辛亥革命紀念郵票有冇咁值錢就唔知，但荒謬程度絕對有得揮。
話時話，香港郵政庸官當道，閉門造車，「失信於民」當食生菜呢筆唔在講，淨係郵票地理失誤嘅蝦碌事件已經不知凡幾。佢哋舊年推出「《基本法》頒布二十五周年」紀念郵票小全張，結果又係錯漏百出，無奇不有，金紫荊廣場由灣仔搬去柴灣、天壇大佛由東涌昂坪搬去大東山、連昂坪纜車總站都被迫搬竇……真正係錯完又錯，一錯再錯，永不改錯，令人嘆為觀止。
相信好多讀者都同功夫茶一樣好奇，郵票錯漏百出，郵政官僚到底知唔知醜字點寫？連基本地理概念都矇查查，唔通佢哋連小學都未畢業？咁嘅庸官都可以濫竽充數，只能證明成個港府都係物以類聚，有人話「廟小妖風大，池淺王八多」，真係一啲都冇講錯。