曾被美國《時代》雜誌選為二○一四年二十五名最有影響力青少年之一的黃衞兵，如今仍然以為可以延續昔日之光環，變身頭戴乾坤圈、臂繞混天綾、腳踏風火輪、手持火尖槍嘅少年哪吒，再以一副嘴藐藐嘅抗爭面孔硬闖泰國，分享他在香港「抗爭」變「學運英雄」嘅經驗；誰知道泰國當局把「英雄」當阿茂，押留佢逾十小時再遣返香港。
黃衞兵「蒙難」期間，自云當時腦海一片空白，一心只想可以回港，不至於如桂民海般就此「被失蹤」，因為佢畢竟係「香港希望」，佢一「蒙難」，香港必然沉淪而不再是福地。果然「念念不忘，必有回響」，佢執番身彩被遣返香港。黃衞兵回到香港呢塊「抗爭零成本」嘅熟悉土地，立刻由一條蟲變成一條龍，聲大大指泰國冇人權，詰問自己為何被列入「黑名單」，一有機會就狂抽水。
黃衞兵在泰國「蒙難」，雖說有美國關注，但美國已經沒有昔日「說了算」的架勢，若黃衞兵以為有老美說三道四嘅「國際壓力」就可以哪吒上身，「蒙難」一次抽水百次，恐怕終有一次計錯數。
其實，只要睇吓網上之「鍵盤戰士」對豪放新進女議員「扑嘢」論之關心多過佢嘅「泰國蒙難記」，就知黃衞兵風雲已過，只可惜佢看不透時勢，以為偶然風雲就可一世風雲，於是抽水不足以滿足其狂妄之心，惟有再自我膨脹呱呱叫，不滿保安局等港府部門在事件發生後沒有聯絡他，又對中國外交部的回應表示「極度失望和遺憾」。
老朽欲辯已忘言，只想對呢位過氣風雲人物贈以「救寒莫如重裘，止謗莫如自修」，這是三國人物王昶告誡兒子的話，意思是要抵禦嚴寒，莫過於再加一件皮袍；要阻止別人的指摘，莫過於加強自我修養。希望「香港希望」珍惜香港呢塊福地對佢厚愛有加，咪成日抽水胡言搞搞震。