政情：會議室食蕉 周浩鼎講古解畫
立法會議員周浩鼎（Holden）上星期出席為新議員安排嘅分享會時，被拍攝到喺會議室內食蕉做早餐。Holden尋日出席傳媒茶敍時重提事件為自己解畫，話當年喺英國讀書時經常以香蕉送三文治做早餐，大讚呢種食法夠健康，更形容食蕉係「好英國人嘅習慣」喎。
無諗過記者在場影低
Holden話，上星期嘅分享會喺早上九點半舉行，佢就提早九點到達會議室準備，加上買咗一條香蕉做早餐，於是喺開會前享用香蕉喇，只係無諗過咁早已經有記者在場，仲將呢一刻影低喎。Holden更話，事後託人問過秘書處，證實會議室內係可以進食，強調唔會放棄食蕉，但會注意自己進食時嘅儀容。
另外，Holden亦講述未來議會工作，佢會着手優化《競爭條例》，而佢身為離島區議員，除咗關心大嶼山交通問題外，更表明會跟進假難民問題。佢解釋，因為新界區朋友好關注假難民帶嚟嘅治安問題，更批評假難民浪費社會資源添！