政情：南港島線通車日期 區議員賭注魚蛋粉
港鐵觀塘線延線即將通車，但南港島線就仍然未有聲氣，搞到有幾位南區區議員大開賭局，輸賭到底南港島線能唔能夠如期喺今年十二月通車，而賭注竟然係一碗魚蛋粉！
據了解，港鐵代表喺九月曾經出席南區區議會大會，但就冇正面回答能唔能夠如期通車，只係不斷重複以年底通車為目標，令人擔心又會延誤。幾位區議員喺會後繼續討論，期間有人提議開賭局，結果支持如期通車及延誤嘅區議員數目相同。
南區區議員朱立威就話，暑假期間多次傳出或會延誤嘅消息，而南區又未如港島線西延咁，喺通車前就有巴士路線改道計劃，所以就押落未能如期通車。佢更指今次係區議員間搞第一次搞賭局，本身諗住賭飯局，但南區出名魚蛋粉，加上近年老字號少咗就更要支持地道美食。佢仲話，如果賭輸會更開心，因為代表港鐵如期通車喎！