政情：首用英文演講 朱凱廸唔「出貓」
聲稱被恐嚇而有家歸不得嘅立法會新界西「票王」朱凱廸，尋日喺香港外國記者會午餐會以英文演講。朱凱廸開始演講時就話，其實今次係佢他首次以英文公開演講，佢嘅助理特意幫佢準備咗好長嘅講詞，但因為有朋友建議佢唔好跟稿讀，而佢亦接納建議，最終順利完成演講及發問環節。根據資料，朱凱廸喺香港中文大學英文系畢業，英文演講對佢果然冇難度。
提港獨 稱願承擔風險
朱凱廸會上完成長達十八分鐘嘅演講後，大會就送咗一條呔畀佢作為紀念，但佢就笑言自己六年冇打過呔，上一次已經係結婚嗰陣，主持人於是就建議佢今日宣誓時可以打呔。
對於成為議員，朱凱廸就話未來四年嘅目標係要令民主自決更具可能性，又話北京對《基本法》部分條文有過大控制權，自決就係應該畀港人有修改《基本法》或香港獨立等選項，就算修改《基本法》可能會令人大釋法或修改其他條文，佢都寧願承擔風險喎。不過，朱凱廸只獲新界西八萬幾選民授權，唔知其他選民又係咪想佢製造風險呢？