政情：黎廣德爭選委席位 惡鬥盧偉國
特首選舉委員會（選委會）界別分組選舉提名期下月八號開始，喺今屆立法會功能界別選舉成績理想嘅非建制陣營，早已揚言要喺多個界別搶位，其中工程界將掀起一場惡鬥。公共專業聯盟政策召集人黎廣德將牽頭向建制派「復仇」，部署逾二十人參選，並捨棄政治色彩濃厚的普選作競選訴求，改為主打「保護港人生活方式不變」等本土議題，務求爭取更多中間票。
選委會工程界別有三十席，上屆由親建制工程師組成嘅兩張名單「工程動力」及「政府工程師工會」共奪得二十六席，而黎廣德牽頭嘅泛民八人名單「普選工程連線」就大敗而回，只係得兩人當選。唔止選委會，立法會工程界功能界別多年來亦係由建制派壟斷，但支持率似乎有所減少。一二年立法會工程界選舉，同為建制候選人嘅盧偉國及何鍾泰一共取得七成二選票，到今屆選舉盧偉國成為建制陣營唯一代表，雖然成功連任，但只取得五成五選票。
擬組廿人名單 部署「復仇戰」
黎廣德認為，立會選舉結果反映工程業界期望改變建制獨大嘅局面，透露正同泛民友好嘅業界部署，目標組成一張超過二十人名單搶攻選委席位。而面對近年政治環境劇變，黎廣德承認與其主打「較離地」嘅普選，倒不如爭取「較貼地」嘅議題，例如保護港人生活方式不變，抗議內地過度干預香港等，藉此爭取更多政治中立嘅工程師支持。
泛民磨刀霍霍，建制派亦密鑼緊鼓籌組參選名單。上屆循工程界當選選委嘅盧偉國，今屆憑立法會議員身份已篤定一席，亦承認業內不少朋友希望佢拉線組成名單，又指「大家已有默契」。不過，當中亦存有隱憂。
建築界早前爆冷 勝算難料
依家建制陣營工程師主要來自三個板塊，包括工程師學會、政府工程師工會，以及工程滙有限公司。鑑於立法會建築、測量、都市規劃及園境界選舉結果爆冷，由非建制嘅姚松炎勝出，建制派事後分析承認部分政府建築師及規劃師因不滿現屆政府施政而「倒戈」，所以同樣隸屬公務員體制嘅政府工程師工會，難免部分人有「倒戈」嘅可能。