中環出更：立會主席辯論 女議員白衣爭妍
新一屆立法會今日開鑼，尋日就先舉行主席候選人論壇，等一眾議員熱一熱身。不過，熱身環節已火花四濺，除咗兩位主席候選人唇槍舌劍外，泛民主派、本土派與建制派互相攻擊，又有議員重提青年新政游蕙禎（游BB）嘅「扑嘢論」，寸佢粗俗唔識議會語言。卓妮更留意到，在座多名女議員均統一以白衫示人。
立法會主席候選人論壇，由代表泛民嘅民主黨涂謹申（阿涂）單挑建制派嘅經民聯梁君彥，有多名議員質疑梁君彥會唔會辭職投票，梁君彥就話除非議案對香港有重大影響，否則基本上唔會參與投票。至於阿涂就話，當選主席會守「三不」，包括不會參與政黨議事、不議論時政，以及不就議案投票。
阿涂梁君彥正面交鋒
民建聯（民記）葛珮帆就將話鋒轉去游BB「扑嘢論」，問兩位候選人若當選主席，會唔會容許有關言論出現喺議會之上。阿涂就力撐游BB只係以粗俗版描述性愛行為，唔使回收更加可以喺議會內使用。梁君彥就話，因為有好多電台電視台會直播立法會開會，通訊局規範咗好多字眼都唔可以出街，議員言語粗鄙或會令機構被罰款，認為日後可以喺議事規則委員會再討論。
有新丁議員就對於成功提問非常興奮，民記張國鈞就笑稱平日做開運動，先能夠保持反應敏捷，以最快嘅速度按下按鈕排隊，認真無厘頭。論壇之後，青年新政梁頌恆就去信立法會秘書長陳維安，要求秘書處從速與梁君彥交涉，查明梁係咪擁有英國國籍，以及有冇退籍先競逐立法會主席一職，否則違反《基本法》及議事規則嘅要求。
論壇之上嘅針鋒相對，都唔及女議員嘅衣飾養眼。十二位女議員之中，就有七人身穿白衫，都唔知係唔係今期流行白雪公主。
游BB連身裙配短靴
不過，衣着都有優劣之分，好似梁美芬、蔣麗芸、劉小麗、容海恩同樣穿上白色西裝外套，後面三個更加由黑色上衣到白色外套都一式一樣，撞到「應一應」，十足制服咁。至於九十後嘅游BB就以白色連身裙，再配上黑色短靴示人，真係高下立見。另外，陳淑莊以一身黑白旗袍示人，表面最突出，但睇落似乎老咗啲囉！
卓妮