政情：泛民 本土莫「名」苦惱
今屆立法會選舉有七位本土自決派人士當選，雖然佢哋都聲稱支持民主，但又好拒抗外界形容佢哋做民主派或泛民主派，再加上廿二名泛民議員同自稱非泛民、非建制嘅醫學界陳沛然，外界就以「非建制派」統稱呢三十位議員，以便同四十名建制派議員區分。但無論係泛民抑或本土派，都有人對「非建制派」呢個統稱有微言，想盡快改番個新名，搣甩個「非」字。
喺回歸初期，政壇只有民主黨、民協同前綫等標榜民主理念嘅政黨政團時，大家都以「民主派」嚟形容佢哋。○三年七一遊行後，出現好多唔認同傳統民主派嘅民間組織，於是外界就以「泛民主派」統稱。之後社民連、人民力量等激進泛民政團出現，佢哋一度唔認係民主派一員，但一二年政改一役，佢哋又稱自己先係「真正民主派」，將走入中聯辦嘅民主黨同民協貶為「偽民主派」，愈講愈亂。
青政眾志拒認民主派
直至今次選舉本土派成功殺入立法會，外界就統稱佢哋係「非建制派」，但係唔少泛民中人認為用「非乜乜」、「非物物」嚟形容佢哋唔止冇特色，甚至帶有非正統、非主流嘅貶意。部分本土派就自認同泛民與建制派係「三分天下」，唔想被歸入同一分類喎！
既然大家都支持民主，咁不如簡簡單單叫番做「民主派」？不過部分本土派如青年新政、香港眾志同熱血公民等，正正係靠反對傳統民主派起家，自然唔肯接受呢個名。
嫌三嫌四 共識欠奉
有學者就提議用西方民主社會廣泛採用嘅「反對派」，惟泛民中人都好抗拒，認為呢個名喺華人社會係帶有貶意，講到佢哋好似「逢政府必反」、「為反對而反對」咁。至於另一個西方用語「在野黨」亦行唔通，因為即使係親北京、親政府嘅建制派，依家並非直接執政，冇「執政黨」又何來「在野黨」呢？
最後有人諗到學台灣政壇嘅「泛藍」、「泛綠」叫法，一於叫「泛黃」，但仍然有人嫌三嫌四，話「泛黃」有變舊、老化同褪色嘅意思，好似唔多吉利喎！改個名都咁難，唔通要搞番個公開命名比賽，再進行全民公投，各方先能夠達成共識？