新一屆立法會仲未正式開鑼，新科靚女議員已經忍唔住語出驚人，聲稱年輕人想「扑嘢」都冇地方，反映房屋問題幾咁嚴峻。點知話口未完，就有大學生涉嫌管理「鴨店」而被警方拘捕，證明性事的確係年輕人嘅頭等大事，提供扑嘢服務仲可以發展成一門生意添。
當然啦，功夫茶咁講並唔係鼓吹不良風氣，而係對於現今部分年輕人嘅大膽作風刮目相看啫。嗱，以前嘅人下海搵食都係為勢所逼，基層居多，幾時見到大學生做埋一份吖，殊不知時移勢易，大學生唔以做「鴨仔」為恥，反以之為榮，連警方都話涉案鴨店生財有道，而且係個體戶經營，不涉黑社會操縱，都唔知讚大學生有生意頭腦好吖，定係講句吾不欲觀之好咯。
呢頭係大學生經營鴨店，嗰頭係新科靚女議員將「扑嘢」呢啲咁粗俗嘅字眼掛在嘴邊，只能說明唔少年輕人嘅價值觀同行事手法同傳統大相徑庭。淨係睇吓各大專院校每年搞嘅迎新營，沒有最淫只有更淫，沒有最賤只有更賤，就知道佢哋樂在其中啦。好似最近嗰單男生喺渡輪舔女同學大腿事件咁吖，唔知嘅以為拍緊AV，唔怪得有人話係「一代新淫勝舊淫」喇。
講真，大學生都係成年人，本來閂埋房門做愛做嘅事，其他人無權置喙，之但係公開去講、公開去做，甚至不惜以身試法，咁就唔同講法嘞。香港始終係法治之區，亦係中國人社會，唔同外國咁開放，大庭廣眾胡天胡帝都視作等閒。再講吖，大學生作為接受高等教育嘅知識分子，納稅人花咗唔少資源喺佢哋身上，理應學以致用回饋社會，唔通為咗搵錢，真係可以連道德底線都拋棄嘅咩？
大家可能會問，點解年輕人會搞成咁？講到底咪就係教育出咗問題咯。自從佔領之亂開始，大學唔似大學，教師唔似教師，「不守法不等於不尊重法治」嘅歪理深入人心。學生上街多過讀書，擲磚當食生菜，卒之咪搞到個個自以為是，以我為尊，鍾意點就點，完全不放法治在眼內囉。紀綱一廢，何事不生，大學生唔係搞港獨出風頭，就係開鴨店牟利，你明點解喇。
講開又講，最近中大因為有學生喺百萬大道開枱攻打四方城，被保安員驅趕都賴死唔走，搞到校長沈祖堯痛心疾首，批評大學生欠缺責任感，又唔識得互相尊重。計功夫茶話齋，教不嚴，師之惰，校方長期放任自流，仲將學生參與非法佔領行動高度評價為乜嘢「為天地立心，為生民立命，為往聖繼絕學」，家陣自食其果，都算係求仁得仁咯！