狗咬人唔係新聞，人咬狗至係新聞，「南亞兵團」幾乎日日上報紙頭版，唔係打交就係劈友，唔係販毒就係非禮，畸士列出嚟，仲長過股市行情表，話時話，香港對上一日平平安安無事無幹，都唔知幾耐之前嘅事咯。
就講呢兩三日吖，最得人驚嘅莫過於南亞裔人士喺油麻地街頭用利刀襲擊同鄉，引發警察開槍，據講當時有人中槍後一度繼續行兇。試諗吓，兇徒連槍都唔驚，萬一揀着市民落手，容乜易渣都冇得剩（口架）！相對呢單猛料，咩越南漢遭同鄉襲擊、巴漢借錢不遂老羞成怒發爛渣打人等等，可以話係小菜一碟。
講真，南亞兵團肆虐重災區嘅居民早就忍無可忍，好似油麻地咁，直頭變咗九反地，每逢入夜，一眾南亞裔人士醉酒鬧事有之，隨街大小便有之，調戲婦女甚至放數販毒都有之，儼然成為治安大毒瘤，附近街坊人心惶惶，直斥呢群搞事者「好煩」、「好難搞」，有人買咗佢哋怕，甚至考慮搬屋。早排元朗居民話要成立「更練團」自保，睇嚟市區都要有樣學樣至得。
冇錯喇，如果唔係官府無能靠唔住，民間又使乜出手自救吖。大家有眼見，成個社會講到口水都乾，叫港府盡快退出禁止酷刑公約，官老爺固然睬你都有味，即使退而求其次，重開禁閉式難民營，又或者好似立法會議員建議咁，盡快公布「死線」，喺截止日期後停發行街紙，減少假難民湧港誘因，當局一樣借咗聾耳陳隻耳。最離譜係警隊高層被質疑同人蛇集團勾結，放任假難民一條龍來港搵食，同攞市民生命安全較飛冇咩分別！
真係諗極都唔明，點解港府到依家仲係對假難民問題唔嗲唔吊，唔通驚畀班政客同人權衞道士扣「種族歧視」帽子？有人就講得啱嘞，強如歐洲咁講究人道同文明，一樣對難民嚴防死守，香港憑乜嘢假仁假義？再講吖，人蛇日日來，罪案天天爆，唔單止市民有得震冇得瞓，亦連累埋班安分守己嘅南亞人士遭受白眼。正如少數族裔團體話齋，外界經常「好人當賊辦」，將佢哋同假難民混為一談，作為受害者，佢哋同廣大市民一樣，力撐港府採取強硬措施。不過講番轉頭，又難怪市民標籤嘅，壞人又冇喺額頭上鑿字，大家淨係知涉及「南亞兵團」嘅罪案無日無之，小心防範都係人之常情啫！
講起都幾唏噓，香港社會各族群從來都可以和諧共處，依家搞到人人自危，談南亞人色變，就係因為港產官僚開門揖盜，助紂為虐，市民真係多得佢哋唔少。