政情：公民講場：曾德成人走茶涼 傑志中心凍過水

原本主責體育政策嘅民政事務局前局長曾德成喺舊年七月「被換人」，由劉江華接任局長一職，而官場一有人事變動，可能亦對政策嘅重要性有唔同諗法，講緊嘅係近日喺足壇討論得熱烘烘嘅「賽馬會傑志中心」（傑志中心）面臨被收回用地一事。由伍健任班主嘅傑志尋日正式回應事件，表明民政局於一一年喺中心籌劃過程中提供不可或缺嘅政策支持，並意有所指話如果冇咗佔地只有一點五公頃嘅傑志中心存在，對本港足球未來必定受到重大挫折。正所謂「人走茶涼」，莫非傑志今次面臨「被搶地」，其癥結問題就係同曾德成「被炒」，隨即亦失去最有分量嘅支持者有關？