政情：救電話資料 張雲正靠白撞
都市人通常手機不離身，更會貪方便用手機記錄重要資料，所以要定時備份避免遺失資料。不過，公務員事務局局長張雲正近排就為咗整唔見電話資料而煩惱，做乜咁唔小心呢？
多年前設定唔記得
張雲正話兩星期前將手機連接電腦時突然熄機，之後就無晒所有資料，要求佢輸入密碼以載入儲存於電腦內嘅備份文件。但係個密碼喺佢第一次將手機連接電腦時設定，事隔多年梗係唔記得，連搵手機生產商求救時都話唔會有個密碼，所以佢只好無奈地接受無晒資料嘅事實，依家仲失去唔少朋友嘅電話號碼添！
不過，佢話到依家仲未放棄，因為密碼可以無上限咁亂撞，認為終有一日撞得到，所以近日仍不停試唔同嘅密碼組合，希望有朝一日可以搵得番啲資料喎。但佢明言已吸取教訓，依家會備份到雲端，亦會用多過一部電腦進行備份，果然夠晒小心。