政情：兩派爭「發展」 鬥張獅口

建制防橫洲事件再發酵

建制派同非建制派尋日分別開會，商討新一屆立法會各個委員會嘅屬意人選，據知建制派內部因應近期橫洲事件鬧到滿城風雨，促使建制派決定包攬發展事務委員會正副主席。據了解，建制派內部為咗搵合適人選都感到頭痛，因為上屆發展事務委員會主席謝偉銓喺建築界連任失敗，據聞最新屬意代表飲食界嘅資深議員張宇人接任主席。

有政界中人分析，張宇人如要成功出任主席，首要證明自己出身同發展事務嘅關連，事關非建制派陣營打算由陳淑莊同姚松炎角逐正副主席，然後每人輪流各做兩年主席，非建制派呢個方案真係非常進取。

不過，建制派亦非省油嘅燈，據聞建制派願意讓出部分委員會正副主席予非建制派嘅同時，已劃定部分委員會主席係絕不放行，其中主戰場估計係上屆時常遇上拉布衝擊場面嘅財委會，據知建制派除屬意保險界陳健波出任財委會主席外，本來一度有傳願意將財委會副主席放行予分屬非建制派嘅會計界議員梁繼昌。但最新消息指，建制派內部會將財委會副主席一併囊括。

消息指，建制派此舉非針對梁繼昌，主要考慮係如果主席因利益申報問題未能主持會議，變相畀泛民有機會把持會議默許拉布。再者，陳健波再當選主席四年，四年後肯定要有接班人頂上，所以據知民建聯陳克勤係屬意接班人之一，料出任財會副主席為未來接棒鋪路。

涂謹申勢爭做立會主席

除咗財委會正副主席外，另外較受關注嘅兩大位置，即係立法會主席、內務委員會正副主席；前者將由獲建制派大部分黨派支持、早前已放棄英國護照嘅工業界第一議員梁君彥，同代表非建制派嘅民主黨資深議員涂謹申之爭，而曾經想推動建制派初選嘅新民黨田北辰，尋日終於自行宣布唔會參選；內會正副主席方面，建制派傾向由民建聯李慧琼出任主席，法律界議員郭榮鏗做副主席嘅呼聲最高。

話時話，建制及非建制派各有盤算，呢個政治操作實在係路人皆見，加上涂謹申尋日重提泛民民意授權較高嘅論調，開價希望建制及非建制派各自出任一半嘅委員會正副主席位置，又預告協調唔到就「自然發揮」，有分析指呢個睇法相信同建制派內部睇法有好大落差，睇嚟雙方短兵相接在所難免。