中環出更：處理違泊 邵家輝變報警專家
做得地區工作，經常與唔同嘅政府部門周旋，但係立法會批發及零售界議員邵家輝（Peter）竟然係對報警相當有經驗。Peter身兼東區區議會寶馬山選區嘅區議員，佢話該區飽受違例泊車困擾，不時都收到居民投訴，佢幾乎日日都要打九九九報案，要求處理違例泊車，結果打到報案中心都認得佢！
Peter話曾經試過一打九九九，之後話自己姓邵，報案中心即刻知道佢係邊個，亦都知道佢又想投訴嘅乜嘢事，仲要馬上收咗線，然後轉頭就見到有警察上嚟抄牌嘞，睇嚟佢真係報警專家！佢仲分享報警經驗，話直接打落警署反而會慢啲，打九九九就係最快。
滅蚊被投訴殺生
講起地區事務，佢又提起曾經試過有次喺區內滅蚊，點知反而有街坊投訴佢殺生，原來嗰位街坊係信佛嘅，而且住得比較高，所以未有受蚊患困擾，佢惟有同嗰位街坊解釋點解要滅蚊，希望對方明白啦！
卓妮