中環出更：胡子勤食盡東西 最愛菠蘿包
香港係一個美食之都，無論高級餐飲抑或街頭小食都令人食得津津有味。卓妮尋日喺活動度見到香港喜來登酒店董事總經理胡子勤（Charles），經營酒店嘅佢不時游走各地，最掛念嘅本地美食又會係乜嘢？佢就話係菠蘿包喇！
日前香港青年藝術協會聯同香港喜來登酒店嘅義工隊及土瓜灣故事館「土家」嘅基層兒童一齊走訪土瓜灣嘅大街小巷，展開美食導賞旅程，到區內茶餐廳、小食店及冰室等品嘗多種地道美食，以攝影嘅方式紀錄，將透過學習絲網印刷技巧來親手製作小食模版，印製成一系列美食環保袋同攬枕。
義工活動 藝術帶入社區
講起地道美食，Charles就話始終最愛菠蘿包，佢出嚟做嘢咁多年都依然不時會揸車入去西貢排隊買新鮮滾熱辣嘅菠蘿包。佢仲話菠蘿包脆卜卜嘅皮已經夠晒好食，唔需要食菠蘿油喎！此外，維他奶亦係佢學生時代充滿回憶嘅飲品， 記得當年兩毫子一支維他奶，要儲幾日零用錢先買到，一放學同啲同學仔一人一支，捧喺手度暖笠笠。
同場仲有香港青年藝術協會創辦人麥蓮茜、聖雅各福群會服務主管伍斯安，同埋教授小朋友絲網印刷技巧嘅設計師陳煒鏗及梁子豪。陳煒鏗話希望透過活動增加基層兒童接觸藝術嘅機會，而絲網印刷嘅技巧平日喺學校中可能會較少機會學到，希望可以引導小朋友享受過程同創作。梁子豪同香港喜來登酒店資深市場傳訊經理張殷豪亦一齊帶領受惠兒童發掘藏於土瓜灣如車仔麵、缽仔糕同豆漿等美食，令參加者對自己嘅社區有更深入的認識。
卓妮