政情：小麗留住教席又嫌減薪
有「小麗老師」之稱嘅立法會九龍西議員劉小麗，一直有關注小販問題，佢早前因為喺深水埗桂林夜市擺賣而被控罰款，更被任職嘅理大專上學院指控佢做小販「秘撈」，決定展開紀律聆訊調查事件。小麗尋日向傳媒表示，已收到校方知會，唔需要就事件出席聆訊，但避過炒魷避唔過減薪，佢透露校方將佢教學時間同人工減剩三分之一，形容自己就算面對打壓，亦唔會退縮。
本身係理大專上學院講師嘅小麗話，校方知悉佢係公民抗命，而唔係兼職做小販，而且喺事件上佢無任何收益，所以紀律聆訊小組委員一致認為，佢毋須就事件出席聆訊。佢話校方喺事件故意作出刁難，只因承受來自更高層嘅壓力，又認為打壓會持續。佢又大爆原先同校方協商將教學時間同人工都減半，點知校方反口，要求佢將教學時間同人工減剩三分之一。
姚松炎離中大 專心做議員
有人被迫減少教學時間，亦有人自願因為議會工作放棄教席。本身係中大地理及資源管理學系副教授嘅建築界議員姚松炎，自參選已經轉為客席講師，佢早前透過facebook宣布，九月三十日係副教授合約嘅最後一天，之後會全心投入議員工作。