政情：創科少人讀 陳繁昌嘆年輕人實際
創新科技日漸受重視，但科技大學校長陳繁昌尋日出席一個與創新科技有關嘅博覽會時，就話香港正處於惡性循環嘅低點，好似唔太認同呢個講法喎！被問到用獎學金能唔能夠吸引年輕人投身創新科技行業，陳繁昌就話依家年輕人同家長都好實際、能夠適應轉變，但佢哋往往從就業前途去考慮，認為創科相對其他範疇遜色，比較少人選擇，難怪佢話係惡性循環喇。
陳繁昌續指，用錢同事業去吸引年輕人入行只能收一時之效，認為長遠要靠佢哋自身嘅熱情同興趣，好似蘋果創辦人喬布斯入行時並非為發達，建議長遠要樹立榜樣去啟發學生。
講到大學喺創科方面嘅角色，陳繁昌就認為大學唔能夠全部做晒技術轉移，否則會弄巧成拙，並改變咗大學嘅性質。佢更話，大學要創造知識、訓練學生，亦都可以鼓勵學生同教授進行技術轉移，而最重要係培養學生嘅世界觀，令佢哋有信心。