政情：眾志疑挪用前學民成員資料
由前香港專上學生聯會秘書長羅冠聰及前學民思潮核心成員黃之鋒、周庭等人喺今年四月成立嘅香港眾志，一直以來風波不斷，先有學民思潮資產處理風波，後有香港眾志註冊出問題。不過，真係一波未平一波又起，近日就有前學民思潮成員投訴，有學民思潮嘅義工聯絡資料懷疑被過戶到香港眾志，不滿個人資料被人出賣。唔通香港眾志以為學民思潮支持者一定都會順理成章支持佢哋？
發短訊通知出席義工會
有聲稱係學民思潮前成員嘅人士報料，指好多之前係學民思潮成員嘅人近日都收到由香港眾志發出嘅電話SMS短訊，通知佢哋出席尋日下午二時至三時、喺銅鑼灣舉行嘅義工會，一齊商討香港眾志未來嘅發展方向。有人就質疑，何解學民思潮成員嘅聯絡資料會過戶畀香港眾志？質疑有人出賣學民思潮成員嘅資料，侵犯私隱。我哋就事件致電香港眾志立法會議員羅冠聰，但佢就未有回覆。
