政情：神婆小麗卜到自己做議員
新任立法會議員劉小麗（小麗老師）喺大學教授社會學，又係本土自決派一員，無論外表打扮抑或印象談吐，都十分西化同現代化。不過，原來佢真正身份係一位「神婆」，精通八字算命，後生時志願唔係做議員或者搞佔領，而係開一間占卜咖啡室為世人指點迷津。小麗老師仲自爆，曾經為自己能否當選議員起過支卦，結果顯示今年事業上會出現大變，算得好準。佢又話，當選後計劃將其一手創立嘅「小麗民主教室」轉型，莫非想轉做「小麗占卜教室」？
小麗老師透露，同好多博士生一樣，當年佢喺中文大學修讀博士學位時遇過唔少挫折，對前景感到迷茫，於是就同幾位密友開始鑽研玄學，求神問卜，其中佢專長八字算命、有朋友學紫微斗數、亦有人玩西方占卜術。大家講吓講吓，就話不如將來開番間占卜咖啡室，等顧客一邊算命批卦，一邊歎茶飲咖啡。
後來小麗老師終於畢到業攞到個博士學位，去咗理工大學教書，並喺佔領期間搵番自己，成立民主教室推廣民主理念，自然就打消咗做神婆同開咖啡室嘅念頭。
算出事業大變 以為被炒
既然小麗老師識得算命，咁有冇幫自己算吓選唔選到立法會議員呢？小麗老師承認私下有算過，但結果顯示係「掹車邊」，同時又算到自己今年事業上會出現大變。佢最初仲以為「事業大變」係因為早前被判非法擺賣罪成，理大會藉詞炒佢魷魚，令佢失業，到後來先領悟到，其實係指佢當選議員、成功進身立法會咁解！
睇番小麗老師最後喺九龍西直選取得三萬八千多票，係該區第三高票當選，仲高過兩名本身係現任泛民議員嘅毛孟靜同黃碧雲，絕對唔算「掹車邊」，呢方面似乎唔係好準喎。唔知佢將來遇到啲好困難嘅政治同投票決定時，會唔會再起番支卦，問吓點做先至百無禁忌、大吉大利呢？