中環出更：阿王敗選 歸咎被扣帽子
工聯會王國興（阿王）喺上月立法會選舉中轉戰超級區議會議席，雖然取得超過二十三萬票，但仍未能當選。阿王尋日出席電台節目時承認，以往面對港英政府，工聯會好容易擔當反對派角色，但依家應該以咩態度面對港府，係好大嘅考驗。
阿王話，喺依家社會氣氛下，一旦妥協就會被扣上帽子，例如喺爭取有薪侍產假時，未有支持改為七日嘅修正案，就畀人話「出賣工人利益」，但當時政府已明言，若通過修正案，就會將主體法案撤回，到時連一日侍產假都冇埋。
會繼續監察政府施政
阿王又重申，自己落選意味失去一個屬於打工仔嘅議席，屬「歷史遺憾」，但佢會以「二十三萬監察」名義，繼續監察立法會和政府施政。佢認為依家超級區議會選出嘅建制派兩席，都屬於跨階層嘅政黨，冇勞工代表，料唔少市民「條氣唔係好順」。被問到工聯會選票流失係咪同中聯辦「契仔契女」有關，佢就認為如堅實可團結到打工仔女，就毋須理會係咪「契仔契女」喎。
至於喺新界東敗選的鄧家彪就話，雖然工聯會喺亞視和健身中心倒閉事件上有出力，但部分市民唔知道，所以工聯會需要檢討，要讓市民知道佢哋嘅工作。