話咁快又到內地「十一」長假，亦係土豪出動嘅時候。有機構預測今年內地出遊人次同旅遊收入都會有超過一成增長，如果香港賺到個零頭，咁就唔使咁閉翳喇。
唔係講笑，本港消費市道寒氣逼人，最新公布八月零售業總銷貨值為三百三十九億元，按年下跌約一成。家陣本港百業蕭條，經濟前景不明，本地客荷包撳到實一實，食粥食飯就睇吸唔吸引到「十一」內地客呢班「外援」，所以本港海關亦不敢怠慢，聲稱連日來將加強打擊旅遊區商店不良營商手法，派員到藥房放蛇；而旅遊事務署亦會聯同旅發局、旅議會等，到紅磡、土瓜灣等強迫購物黑點巡查。
正所謂灑掃庭院迎客來，之前香港耐唔耐就爆劏客醜聞，藏污納垢咯喎，想唔有口皆悲都幾難。海關今年頭八個月接獲藥房以影射藥冒充知名成藥嘅投訴比去年同期跌三成多，而「斤變両」誤導顧客嘅投訴更加大跌超過六成，證明當局有法必依，執法必嚴，的確起到阻嚇作用。家陣冇嘢怕，最怕當局執法又係一陣風。大家有眼見，黑店長打長有，零團費亂象掃之不盡，講到尾咪因為當局執法時緊時鬆，無良商人等到風聲無咁緊，咪又出番嚟搵食囉。
當然喇，淨係靠海關單打獨鬥，始終無辦法徹底解決旅業亂象。前幾年當局大鑼大鼓話要成立旅監局，點知拖吓拖吓冇晒下文，至於外界一再呼籲成立更高規格嘅旅遊政策局，港府更加係借咗聾耳陳隻耳，簡直不負責任。
講真，香港一味食老本，唔係美食就係購物，景點就嚟嚟去去三幅被，本來已經好難吸引回頭客，仲要郁吓就畀人劏到一頸血，係人都怕怕，最慘係班激進組織趕客唯恐不及，見人就鬧見篋就踢，有得揀邊個會貼錢買難受吖。
始終都係呢句︰此地不留人，自有留人處。今時今日內地豪客足迹已經遍及全球，莫講話香港去慣去熟，早就唔馨香，地方更加大，旅遊資源更加豐富嘅台灣亦唔例外，隨着新政府上台，兩岸關係惡化，過往差唔多撐住半壁江山嘅陸客買少見少，業界上至旅行社同酒店老闆，下至旅遊車司機，全部都雞毛鴨血，叫苦連天，搞到要上街遊行，高喊「要觀光不要關光」，當地「旅遊產業」淪為「旅遊慘業」，咪就係同錢作對嘅惡果囉。
一句講晒，黃台之瓜，何堪再摘。今時今日香港經濟面臨內憂外患，四大支柱行業危危乎，唯獨旅遊業叫做撐得吓，如果連呢瓣都冧埋，大家聽攬住一齊死都得嘞！