政情：公民講場：最低工資拉鋸「還」看雙方牙力

最低工資委員會尋日開會討論最低工資時薪水平，但傾咗成日都未能敲定加幾多錢，最初資方提出凍結時薪或只係輕微加五毫，被勞工界鬧爆係侮辱打工仔。直到會議結束後，據聞勞資雙方收窄分歧，預料會喺三十四至三十五元之間再拉鋸。其實商界數口最精，樣樣算到盡，好似最低工資實施前，資方一開價就係時薪二十蚊，最後勞方還價到二十八元正式實施。如此推斷，今次資方或會重施故技，最初話加五毫到三十三元，去到尋日散會還價到三十四元，話唔定最後還到三十四個半就「成交」，加幅啱啱夠抵銷通脹。