政情：租九展做後備點票場選管會花費353萬元
立法會選舉上月投票結束後，「超級區議會」及功能界別選票送往亞洲博覽館（亞博）點票中心點算，而各個當選名單都會喺亞博公布，同時一如以往租用後備場地。政府尋日披露當局花費超過三百五十三萬元，租用咗九龍灣國際展貿中心（九展）作為後備點票中心，最後毋須使用後備場地，變相租場「曬月光」，認真倒錢落海！
根據政府尋日發表嘅憲報，選舉事務處在上月十二日，獲批出一筆三百五十三萬元嘅撥款，租用九展作為後備點票中心。按照當日嘅情況，選票順利送到亞博並進行點算，毋須動用九展場地。
雖然選舉事務處被指浪費公帑，但租用後備場地係該處慣常做法，而面對衝擊事件經常發生，有兩手準備亦無可厚非。有意見認為，九龍灣較機場近市區，認為選舉事務處考慮場地時應該考慮交通安排，唔明該處點解以亞博作為主場地、九展作為後備場地，莫非係博啲示威者唔會山長水遠入到機場衝擊？