政情：卿姐還議辦難忘遭掟屎
前立法會議員劉慧卿（卿姐）尋日正式完成議員任期，結束二十五年的議會生涯。卿姐尋日親自將沙田隆亨邨議員辦事處鎖匙交還予房屋署職員，多個由一九九一年開始已經幫手嘅義工亦有撐場。卿姐話，隆亨邨辦事處係佢第一個地區辦事處，依家叫有始有終，講到最難忘就係十幾年前有人向辦事處掟屎，啲味真係今時今日都記得。
累義工清潔數小時
沙田隆亨邨辦事處同卿姐經歷唔少風雨，卿姐憶述，十幾年前一個夜晚，辦事處門外突然被人掟屎，令義工要清潔幾個鐘，雖然已經捉到兇手，但佢認為警方未有做好搜證，「依家亂拋垃圾都罰一千五百蚊喇，有咩理由當時只罰幾百蚊！刑事毀壞呀！」當日有份清潔嘅義工黃太，尋日亦有撐場，講起當年情況，佢都立即以手掩鼻。
好可惜，咁有意義嘅辦事處唔可以過繼畀黨友林卓廷，要交由房屋署重新抽籤，房署職員仲話個辦事處好搶手，有唔少人申請添！卿姐最後話，今日就同好友去旅行，迎接新開始，希望可以「返嚟再戰、後會有期」！